Aaj social media par jahan quran o sunnat ki roshni mein sahih Manhaj ki baatein aam ki jati hain
wahin logon ki Ek badi tadad biddat o khurafat ko deen ki taraf mansoob kar ke apne napaak irade ko poora karti nazar aati hai.
Yeh cheez sirf social media tak hi mehdood nahi hai balki mimbar o mehrab aur deeni stage bhi is tarah ki soch ko phailane ke liye istemal kiye jaate hain.
Be-buniyad baaton ko deen se jod kar share kiya jaata hai Mauzoo aur Mangadhat Ahadees ka sahara le kar logon ke ibadat ke jazbe ke saath khelwad kiya jaata hai, yahan tak ki kayi baar Hadees gadhne aur shariyat saazi (shariyat banane) jaisi na-qabil e maaf jurm ka bazar garam kiya jaata hai.
Aise logon ko na to Allah ka khauf hota hai, na hi Allah ke yahan jawaab dene jaisa koi Ehsaas!!
Aapne bahut sare messages aise parhe ya sune honge
jis mein makhsoos (khaas) andaz mein mutaiyan (specifies) tadad ke saath khaas amal ya zikr par be-shumar (countless) sawab ki basharat bayan ki gayi ho.
Masalan (for example) : Aap falan dua padhenge toh apko raat me achche khwab aayenge, falan dua padhenge toh apki har museebat door ho jayegi, rizq me kushadgi hogi, falan ibadat karenge toh jannat ka ticket mil jayega, waghairah.
Aur un messages ke niche ye bhi likha hota hai ke jo is message ko share karega uski sari pareshaniyan khushiyon me badal jayengi, aur jo share nahi karega woh shaitan hoga, uska sab kuch barbad ho jayega wagairah wgairah
Aur bhi is tarah ke bakwaas likhe hote hain Aur hadd toh yeh hai ke is tarah ki Mauzoo, Mangadhat, khud ki banayi hue aur be-bunyad baatein share karte waqt Allah ki kasam kha kar ye kaha jata hai ki Hadees mein hai : Jo ise nahi padhega ya padhne ke baad share karne ki bajaye delete kar dega Allah use falan falan azaab me mubtala kar dega Aur Allah ki qasam yeh baat sahih hai maine aisa kiya jaisa ki is message mein hai toh meri muraad puri ho gayi, meri saari pareshani door ho gayi, mujhe itne rupees aur paise mile
Jabki Kai baar message me wazeh shirk paya jaata hai, kaha jata hai ke Allah ke Rasool Mohammad (ﷺ) ki qasam is message ko zarur parhna, maine Mohammad (ﷺ) ki qasam ka waasta diya hai isliye ise zarur parhna, shaitan tumhein parhne se rokega lekin tum shaitan ki baat na man-na waghairah.
Is tarah ke messages ko ahmiyat de kar, usey parh kar aur usey share kar ke bahut saare log bida'at o khurafat ke shauqeen ban jaate hain, aur bahut saare logon ka toh yahi aqeeda o manhaj ban jaata hai, jise apna deen samajh kar jannat ki khuwaishein karte phirte hai (نعوذ باللہ من ذالک)
Is tarah ki sharing aur is se hone waale khatrat ko dekh kar ye sawal uthta hai ke isse kaise najaat (chutkaara) paaya jaye, ahl e ilm (ulama) toh sahi aur ghalat ki pehchaan kar lenge, lekin jahil log kya karen❓
Kaise is museebat se chutkaara payen❓
Is se kaise bachen❓
Toh aaiye shariyat se Iska munasib hal (solution) talash karte hain :
Sabse pehle toh ye Janna chahiye ke is tarah ke messages ki kya haqeeqat hai❓
To darasal is tarah ke messages likhne wale soofi zehn ke bilkul jahil log hote hain jo deen ke naam par duniya bhar ki bidaat o khurafaat ko gale lagane ke liye sab se aage rehte hain....
Isliye har musalman ko janna chahiye ke koi bhi amal us waqt tak Allah Ta'ala ke nazdeek qabil e qabool (qabool ke layaq) ho hi nahi sakta jab tak ke usme do shartein na payi jayeinv:
1) Khalis Allah Rabbul Alameen ki riza ke liye wo ibadat ki gayi ho
2) Aur woh ibadat ya amal Nabi (ﷺ) ki sabit sahih sunnat ke mutabiq ho.
Iski daleel :
وَمَا أُمِرُوا إِلَّا لِيَعْبُدُوا اللَّهَ مُخْلِصِينَ لَهُ الدِّين
Tarjumah : Unhein iske siwa koi hukm nahi diya gya ki sirf Allah ki ibadat karen usi ke liye deen ko khaalis rakhen.
[Surah Al-Bayyinah, Surah #98, Ayat #5]
Nabi (ﷺ) ne farmaya :
مَنْ عَمِلَ عَمَلًا لَيْسَ عَلَيْهِ أَمْرُنَا فَهُوَ رَدٌّ
Tarjumah : Jis ne koi aisa amal aisa amal kiya jispar hamara hukm nahi toh wo amal mardood hai.
[Sahih Bukhari #2697]
Nabi (ﷺ) ki sunnat ke khilaf kiya gaya amal Allah ke yahan kaise marood ho sakta hai❓
Jawab : Iski wazeh daleel Allah Rabbul Izzat ka ye farman hai :
قُلْ هَلْ نُنَبِّئُكُم بِالْأَخْسَرِينَ أَعْمَالًا۞ الَّذِينَ ضَلَّ سَعْيُهُمْ فِي الْحَيَاةِ الدُّنْيَا وَهُمْ يَحْسَبُونَ أَنَّهُمْ يُحْسِنُونَ صُنْعًا
Tarjumah : Aye nabi keh dijiye ke agar (tum kaho toh) main tumhein bata dun ke aamaal ke aitbaar se sabse ziyadah khasare mein kaun hain? Woh hain ki jinki dunyawi zindagi ki tamam tar koshishein bekar ho gayin, aur woh isi gumaan (khayaal) mein rahe ke woh bahut achche kaam kar rhe hain.
[Surah Al-Kahf, Surah #18 Ayat #103,#104]
Yani unke amaal Allah ke bheje hue shariyat ke mutabiq nahi hain isliye sab ke sab Allah ke yahan bekar qarar paye.
Maloom hua ki agar kisi amal me ye dono shartein na payi jayein aur usne poori zindagi ibadat mein hi kyun na guzar di ho phir bhi uski sari ibadatein bekar qarar payengi, mazeed wo shakhs bidaat o khurafaat ka murtakib hone ke jurm mein Allah ke samne mujrim bana khada hoga.
Allah ke Rasool (ﷺ) ne farmaya :
وَشَرَّ الأُمُورِ مُحْدَثَاتُهَا وَكُلَّ مُحْدَثَةٍ بِدْعَةٌ وَكُلَّ بِدْعَةٍ ضَلاَلَةٌ وَكُلَّ ضَلاَلَةٍ فِي النَّارِ
Tarjumah : Badtareen kaam woh hain jinhein (shariyat mein) apni taraf se ijaad kiya gya. Har aisa kaam bidat hai aur har bidat gumrahi hai, aur har gumrahi jahannam me le jane wali hai."
[Sunan Nisai #1578]
Hum musalman hain, aur deen e Islam Quran aur Sahih Hadees par qayem hai, isliye agar hum koi deeni baat karein to Quran o Hadees ke motabar hawale (authentic references) ke saath karein.
Agar koi post aap ke pas aaye jo Quran aur Sahih Hadees ke hawale se khali ho to Aap aise posts delete kar den, usey deeni post samjh kar ke galti se bhi dusro ko share na karein
Nahi to Aap muft mein apna thikana jahannam bana lenge.
Allah ke Nabi Sallallahu Alaihi wasallam ne farmaya :
مَنْ يَقُلْ عَلَىَّ مَا لَمْ أَقُلْ فَلْيَتَبَوَّأْ مَقْعَدَهُ مِنَ النَّارِ
Tarjumah : Jo shakhs mere naam se woh baat bayan kare jo maine nahi kahi hai to woh apna thikana jahannam me bana le. Sahih Bukhari:109*
Neez Sahaba e Kiraam ki yeh halat thi ke woh bina tehqeeq Hadees bayan karne se darte the, ke kahin hum bhi jahannam ki is shadeed wa'eed ke mustahiq na qarar pa jayein.
[Sahih Bukhari #107]
Yahan tak ki woh Hazrat Usman Radhiallahu Anhu ke qatl ke fitne ke baad bina sanad bayan ki gayi Hadees us waqt tak nahi mante the jab tak ke bayan karne wala motabar (authentic) sanad nhi bayan kar deta tha.
Ibne Sireen Rahimahullah bayan karte hai : Sahaba e Kiraam (hadees bayan karne wale se) bila sanad Hadees le liya karte the
Lekin fitne (Usman Radhiallahu Anhu ki Shahadat) honay ke baad se kehne lage : Tum ne yeh Hadees jis se suni hai unke naam batao! Toh jo hadeesein Ahle Sunnat bayan kiye hote use le lete aur jo Hadeesein Ahle Bidat ne bayan ki hoti usey chor dete.
Muqadma Sahih Muslim
Mujahid Rahimahullah bayan karte hain ke ek baar Basheer Al-'Adawi Ibn e Abbas Radhiallahu Anhuma ke paas aaye aur Hadees e Rasool Sallallahu Alaihi Wasallam bayan karni shuru kar din, woh hadeesein bayan karte ja rahe hain, jab ki Ibn e Abbas Radhiallahu Anhum na to unki hadeesein sunte hain aur na unki taraf dhyaan dete hain, phir wo Ibn e Abbas Radhiallahu Anhum se mutwajjeh ho kar kehne lage : Kya baat hai main Hadees e Rasool (ﷺ) bayan kiye jaa raha hun aur Aap hain ke sun hi nahi rahe❓
Ibn e Abbas Radhiallahu Anhuma ne farmaya : Ek waqt tha ki hum kisi ko Hadees e Rasool (ﷺ) bayan karte sunte to hamari aankhein chaukanna ho jati aur humare kaan (ears) puri tarah mutwajjah ho jaate.
Baad mein log jab mukhtalif fikr aur manhaj ko apnane lage to ab hum logon se wahi Hadeesin lete hain Jis ke (sahih) hone ke baare mein hum jante hain.
Muqadma Sahih Muslim
Jab Sahaba ka khairul quroon mein yeh amal tha toh zara sochein humein is fitna waale daur mein kitna mohtat rehna chahiye!!
Imam Ibne Sireen Rahimahullah bayan karte hain :
ان ھذا العلم دین فانظروا عمن تاخذون دینکم
Tarjumah : Yeh ilm (Yani ilm e hadees) deen hai. Isliye jis se tum apna deen (ilm ki shakal mein) hasil kar rahe ho usko parakh lo (ke woh kaisa hai)
Muqadma Sahih Muslim
Abdullah Ibne Mubarak Rahimahullah kehte hain :
الاسناد من الدین لولا الاسناد لقال من شاء ماشاء
Tarjumah: Isnaad (Yani jisse hadees suni hai uska naam batana ya jahan se li hai uska hawala dena) Deen ka aik hissa hai agar isnaad na hoti to Deen ke bare me jiski jo marzi hoti kehta phirta.
Muqadma Sahih Muslim
Aaj Alhumdulillah Ahadees ki sanadein maujood hain, aur taqreeban har Hadees par muhaqqiqeen aur mahireen e hadees ka hukm bhi maujood hai. Iske bawjood jiski jo marzi kehta phir raha hai, is ummat par Allah ki ye azeem neymat na hoti toh phir kya hashr hota.
Aise mauqe par shaitan khoob faida utha kar aksar logon ko gumrahi ke daldal me fasa leta.
Abdullah Ibne Masood Radhiallahu Anhu bayan karte hai : Shaitan insaan ki shakal ikhtiyaar kar ke logon ke paas aata hai aur jhuthi hadeesein sunaata hai, is tarah log firqon me bat jate hain (jab Hadees ki haqeeqat maloom ki jaati hai to) un mein se aik kehta hai: Yeh Hadees aik aise admi ne bayan ki hai jiska chehra pehchana sa lag raha hai lekin naam nahi janta.
Muqadma Sahih Muslim
Yaad rahe shaitan ki yeh trick bahut purani hai, Qaum e Nooh ko bhi isi tarah shirk me mubtala kiya tha. Tafseel ke liye dekhen (Sahih Bukhari #4920)
Lekin Allah Ta'ala ne apne deen e islam ko mukammal taur par mehfooz rakhne ki zamanat li hai, isliye is deen ki hifazat ke liye mukhtalif adwaar (periods) mein bahut se muhaddiseen aur muhaqqiqeen paida kiye.
Jinhone shaitan sifat insaanon ki gadhi hue Mauzoo aur Mangadhat Ahadees ko ek ek kar ke alag kiya. Aur yun ummat ko deen ke naam par bidat o khurafaat ki taraf le jaane wali riwayaat se mehfooz rakha.
Aaj ke is fitno se bhare daur mein har musalman ki zimmedari banti hai ki jahan woh Quran aur Sahih Hadees ke hawale se guftugu karen wahin Kitab aur Sahih Sunnat e Rasool (ﷺ) ke hawale se khaali deen ke naam par ki gayi baaton par us waqt tak dhyan na den aur na hi usey dusron se share karein, jab tak ki uska sahih hona wazeh na ho jaye.
Allah Ta'ala ka irshad hai :
يَا أَيُّهَا الَّذِينَ آَمَنُوا إِنْ جَاءَكُمْ فَاسِقٌ بِنَبَأٍ فَتَبَيَّنُوا أَنْ تُصِيبُوا قَوْمًا بِجَهَالَةٍ فَتُصْبِحُوا عَلَى مَا فَعَلْتُمْ نَادِمِينَ
Tarjumah : Aye Emaan waalo! agar tumhein koi fasiq khabar de toh uski achchi tarah tehqeeq kar liya karo, aisa na ho ke nadani mein kisi qaum ko takleef phuncha do phir apne kiye par sharmindagi uthao.
[Surah Al-Hujrat, Surah #49, Ayat #6]
Isi tarah RasoolAllah (ﷺ) ne farmaya :
قَالَ رَسُولُ اللَّهِ صلى الله عليه وسلم " كَفَى بِالْمَرْءِ كَذِبًا أَنْ يُحَدِّثَ بِكُلِّ مَا سَمِعَ "
Tarjumah : Nabi e Akram (ﷺ) Ne Farmaya : Ke Aadmi Key Jhoota Honey Key Liye Ye Baat Kaafi Hai Ke Wo Har Suni Sunai Baat Ko Aagey Bayan Kar De.
[Sahih Muslim #5]
Agar humein deen me kamyabi hasil karni hai toh diye gaye dalail se makhooz niche diye gaye usool apnane lazmi hain :
Hum sirf Quran aur sahih Hadees se muzayyan baat ko manenge aur usi ko aage share karenge.
Humare saamne pesh ki ja rhi Hadees ko us waqt tak qabool nahi karenge jab tak uske Sahih ya Zaeef honey ki taraf mukammal nishandahi na kar di gayi ho Hadees paish karne wala koi bhi ho.
Agar aap ke saamne koi Hadees bayan ki jaye aur uska Sahih ya Zaeef hona wazeh na kiya gaya ho, toh Aap us waqt tak uspar amal na karen jab tak ke bayan karne wale se Hadees Sahih hai ya Zaeef maloom na kar len.
Ahl e ilm aur aam logon tak Hadees phunchane wale ki zimmedari hai ke hadees zikr karne ke baad motabar (authentic) muhaqqiqeen ne paish ki jaa rahi Hadees par jo hukm lagaya hai use poori amanat ke sath zikr karein.
Jab ahl e ilm ko aise massages milen jis mein authentic references na hon toh fauran us par aitraaz karen aur uska radd karen taaki haq wazeh ho sake.
Is tarah ek aisa behtreen mahol banayen jis mein sahih deeni paigham share karne ka riwaaj ho aur batil apna sar uthane se darr mehsoos kare.
In usool ko apna kar hi maujooda halat aur deen ke naam par diye ja rahe zehreele bidaat o khurafaat se bacha ja sakta hai. In usool ki roshni mein agar hum kaam karenge toh zaroor Allah rabbul alameen be shumaar dunyawi aur ukharwi ne'maton se nawazega.
Lekin in usool ko nazar andaz kar ke deeni masail par amal karenge toh kai baar sawab to door ulta hamein gunaah milega aur gumrahi humara muqaddar ban jayegi.
Allah ta'ala hum sabko Quran aur sahih Hadees ki roshni me zindagi guzarne ki taufeeq ata farmaye. Aameen...
__________________________________________
🥀To get Reward in Akhirah,🥀
Share this with your families and friends
BLOG - quranhadeestalk.blogspot.com
ARMAAN ANSARI
0 Comments