Ya Allah Humein Muaaf Kar De

Ya Allah Humein Muaaf Kar De

Ya Allah hum sab ko un saare gunaho ke liye maaf kar de jo hum ne jaan bojh kar aur anjaane me kiye.

Aye Allah hum ko maaf farma dein dusro par un kaamo ka ilzaam lagane par jo unhone nahi kiye the, gheebat karne par, dusro par tohmat lagane par, unki izzat kharab karne par, dusro ka humari wajah se kisi ko bura samajhne par, logo ko unke huqooq naa dene par, musibat aur Aazmaish me bechaini aur sabr naa karne par, ek buri zubaan aur bure amaal wala na-shukra, kamzor, gussa aur taqabbur karne wala shaksh banne par.

Ya Allah humein un saare gunaho ke liye maaf kr dein jo hum karte hain aur unko gunah bhi nahi samajhte.

Aye Allah Ta'ala humari maghfirat kar dein aur humein humari nafs, zubaan, haath aur humari buri soch aur amaal se mahfooz rakhein.

Ya Allah humein maaf farmaiye, humari hifazat farmaiye aur humari rehnumai kariye, hum Aap ke begair kuch nahi, hum gumrahi me nahi padhna chahte aur dusro ko aur apne aap ko nuksaan nahi pohchana chahte, hum Aap ka gussa aur duniya qabr aur Aakhirat me Aapke Azaab ka saamna nahi karna chahte.

Ya Allah hum be bas hain humari madad karein, humein inayat karein, hum Aap ke mohtaaj hain, humein Aapki zarurat hai.

Aye Allah Ta'ala humari rehnumai karein, humari madad farmaiye aur ek lamha ko bhi humein akela naa chodein, aur us waqt tak humein zinda rakhiye jab tak zindagi humare liye behtar ho, aur us waqt maut de dein jab Aap hum se puri tarah raazi ho aur hum se milna pasand karein.

Ya Allah Ta'ala Aap jaante hain ke hum galat karte hain aur nekiyaan karne me nakaam ho jaate hain lekin Aap ye bhi jaante hain ke hum ye sab apni kamzoriyo ki wajah se karte hain.

Aap sabse zyada maaf karne wale aur meherbaan hain, ya Allah Ta'ala humein maaf kar dein aur har ek ki yaddasht se humare saare gunaho ko mita dein aur qayamat ke din humare khilaaf koi gawah naa chodein. Aameen!

🌷Share With Others🌷

💐Jazakallahu Khairan💐